الزواج قسمه ونصيب ولا الشيخ زبيب؟

من قديم الازل وقد كانت الخرافه جزء من حياتنا البعض يؤمن بها ولا يستطيع ان يتخلص منها والبعض يرفضها والبعض الاخر لايعلم عنها شئ ومن خرافاتنا خرافات( معمولك عمل) نعلم جميعا ان السحر مذكور فى القرآن واننا لابد ان نحتاط منه لكن هل فكر احدنا فى كيفية الوقايه منه؟
بمنتهى البساطه الحل بين ايدينا وهو القران الكريم قراته تقيك من اى شئ وقد ذكر حديث عن الرسول صلى الله عليه وسلم اذكر فيما معناه ان من خرج من بيته قاصد احد الدجالين فقد كفر بما نزل على محمد اى بالقرآن الكريم
وفى حياتنا الحاليه بكل ما فيها من تكنولوجيا عصريه ومن قبل التكنولوجيا الايمان بالقدر والنصيب نجد ان هناك منّا من يقصد الدجالين ويدعهم يتحكمون فى حياتهم ففى بعض المناطق الشعبيه فى مصر نجد مشهد يتكرر كثير وهو عند تاخر زواج احد الفتيات ووصولها الى سن ال30 نجد الجاره الست الطيبه اللى صعبان عليها البنت اللى بارت وهى زى القمر تسال الام سؤال لا يتغير (انت ليه ما بتدوريش على بنتك يا اختى؟) وبما ان الام هى والده لفتيات متعلمه فقد تغير تفكيرها قليلا فلا تفهم الجمله فتسال الجاره(قصدك ايه يا اختى؟) ترد الجاره الشاطره اللى بتفهم فى كل حاجه (يعنى مش خايفه يكون معمولها عمل؟)
فيلتفت نظر الام الى هذا الاتجاه وبما انها ام اى قلب رقيق تريد ان تفرح وتطمئن على ابنتها ولم يعد بيدها حيله يغيب نظرها عن وجود من بيده الامر ولا تاخذ بالاسباب الحقيقيه وتبدا فى هذا الطريق تذهب الام ومعها ابنتها الى الشيخ زبيب التى ذكرته لها جارتها (الست الشاطره) وعندما تذهب للشيخ بتكون البنت الجامعيه رافضه لما يحدث لكنها تذهب مع والدتها لتثبت لها ان ذلك خرافه وايضا كى تريح قلب والدتها والمشهد الذى يتكرر ايضا عند الاخوه (زبيب) اى الشيوخ الدجالين هو وجود بشر من جميع المحافظات وهو ما يجعل الام تصدق ان هذا حق وليس خرافه فتسال من بجانبها القادمه من الصعيد واللى جايه للشيخ بعد ما عرفت ببركاته من جارتها التى لم تنجب طوال15 عام ولفت على الدكاتره والعلاج ما عملهاش حاجه بس اول ما جت للشيخ زبيب ربنا كرمها وجابت توأم وعقبال عوض بنتك يا اختى فيقوى موقف الام امام ابنتها الرافضه للوجود فى هذا المكان فتقولها شفتى مش قلتلك دى الناس بتجيله من كل حته يعنى هو احنا بنفهم والناس دى كلها ما بتفهمش فتصمت البنت ولا تجد ما تقوله فهى تنتظر حتى ترى هذا الزبيب ثم تدخل البنت مع الام فلا تجد ذلك الشكل القديم (ابو سبح) لكن تجد رجل يرتدى ملابس الشيوخ وهادئ جدا فتشك فى الامر وتراودها بعض الاسئله (معقوله يكون ده بجد ويكون فى حاجه اسمها شيخ بيفك عمل؟ امال اللى اتعلمناه ده ايه؟) وتسمع الى صوت الشيخ زبيب اهلا يا بنتى طبعا انت جايه علشان الزواج اتاخر شويه فتفرح الام وتقول ما شاء الله بركه الا ان الفتاع تعلم ان هذا شئ بديهى من الممكن ان يعلمه اى حد لانها لا توجد دبله فى يدها وكمان الحكايه باينه ما فيهاش معجزه فتعلم وتتاكد من ان الحكايه نصب فى نصب ولكن تنتظر لتسمع فيقولها الشيخ انت يا بنتى معمولك عمل ويجيب وعاء فارغ(حله) ويفتحها ويجعلهم يرونها جيدا لافيها ورق ولا حاجه ثم يضع بها ماء ثم يغطيها ويقرا عليها بعض الاشياء ثم يفتحها ويقولها طلعى العمل بايدك فتلاقى ورقه مكتوب فيها بالاحمر وفى هذا الوقت تهلل الام لا اله الا الله ما شاء الله عليك ولكن البنت لاتصدق ما تراه او يحدث وهذا صراع العقل مع الاهواء الام تريد ان تصدق اى شئ والبنت لا تريد ان تصدق سوى ما يستوعبه عقلها فتبدا الام فى التخمين هى ام كريم اللى طلبت ايدك لابنها وانت رفضتيه ما فيش غيرها اكيد فيقول الشيخ زبيب انا ما اقدرش اقولك اسم بس ممكن اقولك صفات هى امراه طويله وبيضاء ترد الام هى والنبى ما انا سيباها ربنا يكرمك يا شيخ فيقول الشيخ احنا بنعمل اللى علينا وكله بفضل الله فتخرج الام وابنتها الام فرحانه والفتاه لا تصدق ما يحدث فكل هذا هراء وعندما تخبر الام بهذا تقولها طيب والورق والست اللى عامله العمل ترد البنت عادى الورق كان فى الغطاء اما الست انت اللى قولتى هى مافيش غيرها يعنى انت اللى عرفتيه انها ست والصفات اللى قالها تنطبق على 90 من ستات مصر وده كله كذب والله حرام الاسباب اللى اخرت زواجى هى انى بنت متعلمه تعليم عالى فى منطقه شعبيه اغلب من بها تعليم متوسط وكمان انى والحمد لله جميله ومثقفه ومعروف انى مش حارضى باى حد كمان باشتغل وعيبى انى عارفه حقوقى وده دلوقتى عيب يرفضه اى راجل فى اى بنت هى دى الاسباب مش الشيخ زبيب يا ماما ربنا مفيش غيره نتوكل عليه ومفيش حاجه اسمها اعمال طالما فى قران بيحفظنا وحديث الرسول صلى اللى عليه وسلم بيقول ان اللى بيقصد ناس زى دى بيكون كفر بالقرآن عوزانا نبقى كده ولا المفروض نشغل عقلنا ؟ اعوذ بالله يا بنتى كفر ايه يا ساتر يارب خلاص يا بنتى خلينا نستنى النصيب وبلاش الشيخ زبيب واللى عاوزه ربنا يكون
يا ترى الحكايه ايه قسمه ونصيب ولا الشيخ زبيب؟